Ua Amassada Generau conviviau
 
entà Lo Rondèu de Castèlnau !
Lo divés 7 de deceme a 20h, vint e cinc membres de l'associacion Lo Rondèu de Castèlnau que's son amassats entà la lor Amassada Generau annau .

L'escadença de har lo punt sus ua annada rica en eveniments e en accions entà promòver la cultura occitana.

L'associacion qu'a avut lo plaser d'arcuélher navèths participants, mentre que daubuns absents desencusats an exprimit lo lor estrambòrd entà vàder benevòles pendent lo hestau vienent.

Après l'obertura de la session, lo bilanç morau e financèr de l'annada escorruda qu'ei estat presentat .

Lo Rondèu qu'a ahortit lo son ròtle dens lo malhatge territoriau en miei rurau gràcias a las soas nombrosas collaboracions dab associacions locaus e que s'ei illustrat a l'internacionau gràcias au projècte europèu Trad’Euròpa qui a permetut ua residéncia d'artistas en Romania e deus concèrts en Transilvània.

Au demiei deus moments hòrts dens Gèrs, que's retien lo hestau de Sent-Elix d'Astarac, la jornada gascona entaus escolans de Castèthnau Barbarens atau com animacions culturaus marcantas com bals, deus talhèrs e de las participacions a las Jornadas deu Patrimòni e au salon Gasconh’a Taula.

L'Amassada Generau qu'a egaument permetut l'eleccion deu burèu navèth : Sylviane Baudois, Lionel Belbézier, Josiane Castebrunet, Patrick Crampou, Bruno Menon, Josiane Mothe e Patrick Nugeron.
Lo programa entà l'annada a viéner qu'ei estat desvelat dab, ne punt d'òrgue, lo hestau Lo Rondèu qui's tienerà deu 25 au 29 de junh de 2025.

Aquera edicion que s'anóncia excepcionau, dab de nombrosas nautats : un bal dab Rémi Geffroy e companhia, en associacion dab lo projècte Trad’Euròpa e deus musicians de Transilvània, de las conferéncias e estagis de dança, deus talhèrs d'instruments entà la preparacion deus aperitius musicaus, deus bals e concèrts, deus repaishs hestius, ua randolejada, la presentacion de la coregrafia navèra "lo Rondèu de Castèlnau" per Hélène Marc, e plan d'autas suspresas. Lo hestau que s'espandirà aquera annada sus cinc dias, dens un ambient hestiu e calorós.

En parallèla, autas activitats que son previstas, com ua jornada dedicada a las 15-25 ans organizada en març per Hélissende, Lou, Lisa e Julien, estudiants en BTS DATR deu Licèu de Beaulieu, un talhèr intergeneracionau adulte-mainatge a l'entorn de las danças tradicionaus e de las participacions a las Jornadas deu Patrimòni atau com au salon Gasconh’a Taula.

L'Amassada Generau que s'ei clausurada dens la convivialitat, dab un tortèth e deu vin blanc, perseguint atau l'esperit hestiu qui hè l'amna de l'associacion.